Выстава World Press Photo  2018 у Гродна
02.05.2018 | 0

Выстава World Press Photo 2018 у Гродна

Міжнародная выстава World Press Photo 2018, на якой можна будзе пабачыць найлепшыя сусветныя прэс-фатаграфіі 2017 года, прыедзе неўзабаве ў Беларусь. Культурніцка-адукацыйны цэнтр ЦЭХ прывозіць выставу ў Мінск ужо трэці раз. Сёлета таксама адбудзецца пашырэнне беларускай геаграфіі «Прэс-фота» – сусветна вядомы праект упершыню пабачаць і ў Гродне.



Фотаконкурс «Сусветнае прэс-фота – 2018», вынікі якога прадэманструюць дзве беларускія выставы, сабраў 4548 фатографаў са 125 краінаў, якія заявілі на конкурс 73 044 выявы. Журы, у склад якога ўвайшлі аўтарытэтныя фатографы і фотарэдактары з усяго свету, адзначыла найлепшых фатографаў з усяго свету ў васьмі намінацыях («Пільныя навіны», «Агульныя навіны», «Актуальныя тэмы», «Людзі», «Экалогія», «Прырода», «Спорт», «Працяглыя праекты»). Тытул «Сусветнае прэс-фота – 2018» атрымала праца Ранальда Шэміта. Гэты венесуэльскі фатограф зрабіў для мексіканскай філіі «Agence France-Presse» здымак ахопленага агнём пратэстоўца падчас антыўрадавых выступаў у Каракасе 3 мая 2017 года.

12 красавіка 2018 года фатографаў-пераможцаў запрасілі ў Амстэрдам, дзе ўручылі ўзнагароду «Залатое вока» падчас арганізаванага фундацыяй «Сусветнае прэс-фота» Фестывалю візуальнай журналістыкі. Фотаздымкі, якія перамаглі ў конкурсе «Сусветнае прэс-фота», як і ў папярэднія гады, утварылі міжнародную перасоўную выставу. У 2018 годзе выставу «Сусветнае прэс-фота» ўжо пяты раз прымае Беларусь (апошнія тры гады афіцыйным партнёрам праекту выступае культурніцка-адукацыйны цэнтр ЦЭХ). Сёлетняя экспазіцыя надрукаваная на шырокафарматных «Canon» і планшэтных друкарках «Arizona».

У 1955 годзе група галандскіх фатографаў арганізавала міжнародны конкурс «Сусветнае прэс-фота», каб паказаць свае працы аўдыторыі па ўсёй планеце. З таго часу конкурс развіўся ў найбольш прэстыжнае на свеце спаборніцтва фатографаў, а выставы конкурсу ладзяцца больш як у 100 гарадах 45 краінаў.

Цягам 60 гадоў, калі фундацыя «Сусветнае прэс-фота» працавала ў сваёй сядзібе ў Амстэрдаме як творчая, незалежная, некамерцыйная арганізацыя, свет няспынна змяняўся, і новыя распрацоўкі ў медыях ды тэхналогіях унеслі змены ў журналістыку і сторытэлінг. Місія фундацыі пашырылася, галоўная задача цяпер – правесці журналістаў, сторытэлераў і іхных гледачоў праз увесь свет, па яго поўным выклікаў неверагодным ландшафце.

Арганізатары конкурсу вераць у моц выявы і важнасць дэманстрацыі высакаякасных візуальных гісторыяў. Іхная мэта – далучыць свету да гісторыяў, якія маюць значэнне.

Мы ўпэўненыя, што фатаграфія мае важнае значэнне ў медыйным полі Беларусі, і што яе падтрымка, як і падтрымка незалежнай журналістыкі, – адна з галоўных задачаў у фармаванні грамадзянскай супольнасці. І тэматычная разнастайнасць і прафесіяналізм фотапрацаў, рэпрэзентаваных у межах конкурсу «Сусветнае прэс-фота», несумненна спрыяюць гэтаму.

З павагай,
беларуская каманда выставы «Сусветнае прэс-фота»

Мерапрыемства ў Facebook >>


Перыяд працы выставы: з 3 да 17 мая 2018 года
Месца: гандлёвы цэнтр «Old City» (Гродна, вуліца Дубко 17)
Час працы: панядзелак – чацвер, нядзеля: 10:00–21:00, пятніца, субота: 10:00–22:00
Даведкі: events@cech.by // +375257103129

Уваход вольны 

Оставить комментарий

Оставлять комментарии могут только зарегистрированные пользователи. Пожалуйста, авторизируйтесь или зарегистрируйтесь.